قصص وروايات

خالد 2

فرح بعدم فهم:مراة مين

مى :مراة خالد ومازلت

شهقت فريده ووضعت يدها على فمها من الصدمه اما فرح فوقفت من مقعدها قائله:انتى بتخرفى بتقولى ايه خالد مش متجوز غيرى انا ومش بيحب غيرى انا

هنا قهقهت مى بصوت عالى وبسخريه قالت:بيحب مين ياقمر اها بيحب فرح السيد منصور اللى جريته هو واهله وذلته واتجوزت ابن عمها الغنى وباعته

فرح:انتى ايه الى بتقوليه ده امال اتجوزنى ليه

مى:ببساطه عشان انا مش بخلف ربنا اراد كده وهو طبعا عاوز يخلف وكان رافض الموضوع ده نهائى بس انا اصريت عليه وانتى جيتى فى طريقه يبقى ليه ماينتقمش من اللى حصل زمان ويبقى انتى الوحيده المناسبه للمهمه اللى احنا عاوزينها

فرح بصدمه:مهمه

مى:اه مهمه انتى هاتولدى والطفل هايكون بينا احنا الاتنين ده الاتفاق مع خالد ماتقلقيش هايتكتب باسمك احنا مش بنحب نظلم حد

فرح:اطلعى بره بيتى بره

مى:بيتك بيتك ايه دا بيت جوزى يامدام عامة ماتستنيش خالد يجى لك بعد كده كتير لان دوره معاكى انتهى استعدى للى جاى الله يكون فى عونك بس تعرفى انتى فعلا حلوة ماعرفش ليه بيكرهك كده

فرح:بيكرهنى

مى بضحكه خبيثه:اوعى تكونى صدقتى شوية العسل اللى فاتوا دا بس كان عشان تحملى انا هامشى وهاسيبلك صور وفيديو فرحنا تتفرجى عليهم خلود كان عاملى احلى فرح فى احلى قاعه

هنا ذهبت مى وتركت فرح فى حاله لايرثى لها

فريده :فرح حبيبتى اوعى تصدقى اى كلمه من اللى اتقالت دى جايه توقع بينكم

فرح بدموع تنهمر من عينيها على وجنتيها فى صمت:انا كنت حاسه بحاجه غلط بتحصل اوقات كتير اوى كان يبصلى نظرات غريبه مش فاهماها واوقات تانيه كان يعطينى ظهره واحنا نايمين واوقات تانيه كان يبعد عنى فى اوقات ماينفعش يبعد فيها لما قلت له انى حامل بعدنى عنه واتكلم معايا بطريقه وحشه وسابنى ومشى كتير كان يكون بيتكلم فى التليفون ولما ادخل يقفل

هنا جلست فرح على الارض تبكى بانهيار وتقول بصراخ وهى تنظر الى الاعلى:ليه ليه يارب مافيش غيرى يتعذب ليه انا طول عمرى بتظلم ليه انا ليه انا على طول

انهمرت دموع فريده من عينيها وحمدت الله انها بجوارها فى ذلك الموقف

فريده:فرح ارجوكى اهدى عشان تعرفى تتصرفى

فرح:انا مش هاخليه ياخد ابنى منى ده الحاجه الوحيده اللى هاتهون عليا اللى انا فيه انا لازم اخليه يطلقنى بأى طريقه

فريده طيب اهدى بس انا هابات معاكى والصبح تيجى معايا بيتى تعالى نجهز شنطك

نهضت فرح وأخذت الاسطوانه التى تركتها مى وضعتها فى جهاز الكمبيوتر ونظرت الى حبيبها وهو يتزوج باخرى فى العلن يرقص معها يمسك يدها كل ماتمنته هى رأته ولكن مع امرأه اخرى غيرها

نهض خالد لم يعرف النوم طريقه ذهب الى مى لم يجدها الى ان رآها تدلف من باب الفيلا

خالد:انتى كنتى فين ياهانم دلوقتى

مى:كنت بعمل اتفاقنا اللى اتفقنا عليه

خالد بدقات متزايده :انطقى كنتى فين

مى:رحت للبرنسيسه وعرفتها انا مين وعرفتها انتى اتجوزتها ليه واتفاقنا ليه

أمسكها خالد من ذراعها بحزم قائلا بغضب:انتى اتجننتى رحتى ليه انا كنت هاحل المسئله دى لوحدى ياغبيه

مى:اه ياخالد عندك حق انا غبيه وعبيطه كمان انا العقيمه اللى وافقت جوزها يتجوز عليها واحده تانيه لا ومش اى واحده دى حبيبته القديمه اللى ذلته هو واهله مش بتشطر غير عليا عشان عارف انى بحبك وبغير عليك

ترك خالد ذراعها:اتسرعتى ليه يامى كنتى اصبرى بس شويه

مى بدموع تماسيح:غصب عنى الغيره هاتموتنى هى اخدت كل حاجه وانا محصلتى صفر

خالد:انتى اللى متوهمه كده صدقينى انتى مافكرتيش انها ممكن تسيب البيت وتمشى ومانعرفش طريقها

مى:ايه

خالد:كان رد فعلها ايه قالت ايه

مى:ماتكلمتش فضلت ساكته وتقولى انتى بتخرفى بتقولى ايه وطردتنى فى الاخر بالحق كان معاها واحده صاحبتها

خالد:انا هالبس واروح لها بسرعه

مى:ماشى ياخالد روح

صعد خالد الى الاعلى اما مى فابتسمت ابتسامه شيطانيه لنجاح خطتها على النحو الذى تريده

شاهدت فرح صور زفاف خالد والفيديو ايضا كانت فى حالة صدمه وهياج

فرح:انا عاوزه امشى من البيت ده مخنوقه فيه مشينى من هنا بسرعه يافريده

فريده:طيب ياحبيبتى اللى يريحك تعالى نلم هدومك وتعالى معايا بيتى

صعدوا الى الاعلى قاموا بتجهيز حقائب فرح خرجت فريده وتركت فرح لتبدل ملابسها جاء فى هذا الوقت خالد ووجد صور زفافه موزعه على ارضية غرفة الاستقبال وفريده جالسه على احدى الارائك

فريده بصدمه:خالد

خالد:لو سمحتى يامدام فريده تسبينى مع فرح شويه

فريده:فرح منهاره لو سمحت خلينى اخدها معايا

خالد:مش هاكرر كلامى تانى لو سمحتى سيبنى اتكلم مع مراتى لوحدنا لو سمحتى

فريده:طيب لو سمحت براحه عليها هى مصدومه وماتنساش انها حامل

خالد:اتفضلى يامدام فريده مش هاتخافى عليها وعلى اللى فى بطنها اكتر منى

ذهبت فريده باحراج وتركت خالد يصعد الى فرح كانت فرح فى غرفتها لاترتدى سوى قميص قطنى اسود وتقوم بتحضير ملابس لكى ترتديها دلف خالد الى الغرفه ظنت فرح انها فريده نظرت الى الخلف وجدته خالد أخذت فرح الروب خاصتها وارتدته بسرعه

خالد بسخريه:انا شايف المدام جهزت الشنط وماشيه ودى تيجى يامدام مش لما تحاسبى على القديم

نظرا لكثرة الرسائل والطلبات اللى جاتلى فصل طويل اهو وبدرى ارجو التفاعل

الفصل السادس والسابع عشر

خالد:مش لما نتحاسب الاول

نظر خالد اليها وجدها حائره ضائعه لو كان الضياع يتكلم لقال انه سكن جسد تلك المرأه شئ داخله كان يود طمانتها ولكن ذلك الغباء والعناد كانوا قد تمكنوا منه

فرح ودموعها تنهمر دون ارادة منها:قولى ان اللى جت من شويه دى كدابه وان الصور اللى تحت دى مش انت قولى انك بتحبنى انا وبس وان اللى حصل ده كابوس وهاصحى منه

تحرك خالد نحوها ووقف امامها

-تفتكرى انى نسيت اللى حصل زمان تفتكرى انى نسيت انك لعبتى بيا واتسليتى عليا ورمتينى وانا خارج حياتك

نظرت فرح لعينيه بحيره عيناها تلمع من الدموع

-يعنى انتى بجد راجع عشان تنتقم منى يعنى انتى مش بتحبنى

استرسل خالد بجمود

-حبيتك زمان لدرجة لما مشيتى حياتى كانت قربت تقف وهجيت من البلد كلها مى اكتر حد وقف جمبى واستنتنى فضلت راهنه حياتها عشان كلمه منى كان رد جميل منى انى اخليها ام

جلست فرح على ركبتيها تبكى وتتكلم بصراخ

-ليه ليه انا كفايه عليا اللى شوفته انتى كنت اخر امل ليا قلت ربنا عوضنى بيك من اللى شفته

ضحك خالد بسخريه

-شوفتى ايه ها اتكلمى شوفتى ايه جه وقت المصارحه والكلام انطقى

نهضت فرح من موضعها مسحت دموعها بعنف

-طلقنى لو سمحت وسيبنى امشى اظن كده المسرحية انتهت برافو عليك تمثيلك كان رائع وأدائك كان فوق الممتاز

أمسكها خالد من ذراعيها بحزم

-لو حد فينا تمثيله ممتاز فهو انتى مثلتى دور البريئه اللى ابوها بيكرها ولجئت لابن السواق الوسيم اللى حبها واحتواها وهب راحت اتجوزت راجل غنى وهانته ادام الناس للاسف الغنى طلع مش راجل ومابيعرفش صبرتى ست سنين ماهى الفلوس حلوه برضه وتستاهل كفايه عليه ست سنين ترجعى مصر واول مااعرض عليكى الجواز وفى السر ترضى كان نفسى ترفضى جدا عشان احس انك عندك كرامه لكن ازاى دا خالد الاهبل بقى غنى من تانى دور البراءه اترسم ترميلى كل شويه انك كنتى مجبره ابوكى جبرك انك تتجوزى واحد غنى بس هل ابوكى جبرك تقعدى معاه ست سنين انتى كدابه وماديه انتى ست مش كويسه انا اتعاملت معاها شكلك الحلو ده مايدلش على اخلاقك الواطيه للاسف

انهال خالد عليها بوابل من الكلام اللاذع الفاظ لاول مره تسمعها فرح بل لاول مره ينطق بها هو تجمدت فرح فى مكانها كانت ستحكى له مامرت به من حبس ابيها لها لحبس ايهاب لها زواجها من ايهاب حتى لايضيع مستقبل خالد على يد والدها توسعت عيناها كانت تنظر له فقط

ترك خالد يديها

-ماتردى قولى يالا اللى عندك قلتى كتير انك عاوزه تفتحى فى الماضى افتحى يامدام

لم يتلقى منها اى جواب فقط دموع تهبط على وجنتيها شعرت فرح ان الدنيا تدور بها عقلها يرفض ماسمع منذ قليل قلبها ينبض بشده انفاسها اصبحت لاهثه رأى خالد شحوب وجهها الذى يظهر جليا عليها وانفاسها العاليه الى ان سقطت على الارض مغشيا عليها

توجه خالد اليها على الفور كان جسدها بارد للغايه وشفتاها مالت الى اللون الازرق لم يعلم لما دب الزعر فى قلبه خوفا عليها ام خوفا على جنينه الذى تحمله ابدل لها ملابسها باخرى وعلى الفور حملها وتوجه بها الى اقرب مشفى وبعد مده خرج الطبيب من غرفة الفحص

خالد:خير يادكتور مالها

الطبيب:سكرها كان واطى وضغطها واطى تقريبا ماكلتش حاجه من الصبح احنا عملنا لها سونار والجنين كويس جدا والحمل قوى بس لازم رعايه على الاقل فى اول فتره ولازم تاكل كويس هى فاقت دلوقتى تقدر تاخدها بعد ماتخلص المحاليل

خالد:متشكر اوى

دلف خالد اليها وجدها فى حالة شرود

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى