خالد 2

عاد خالد الى الفيلا الخاصه به فوالده ووالدته رفضوا ان يتركوا شقتهم التى عاشوا فيها لسنين رفضوا الذهاب للعيش مع خالد ومى.

فى فيلا خالد

مى:اهلا يادكتور خالد لسه فاكر ان ليك بيت

خالد:فيه ايه يامى ماانتى عارفه انى بجهز للشركه

مى:انا زهقت وتعبت انى دايما فى هامش حياتك خلينى اجى اشتغل معاك فى شركتك

خالد بغضب:قلت لك الف مره لاء يعنى لاء

مى بصوت عالى:انا تعبت وارفت انا عاوزه اشتغل

امسكها خالد من ساعديها بحزم:صوتك مايعلاش والا هاتتحملى انتى نتيجة كلامك ده

هنا بكت مى قائله:انا عارفه عشان مش بخلف انتى ماعدتش طايقنى وهاتتجوز عليا زى ماخالتى عزه بتقولك على طول

خالد بصدمه:انتى بتتجسسى عليا انا وامى يامى

مى بنفى:لا والله انا سمعتكوا وانتوا بتتكلموا وهى هنا المره اللى فاتت وبتقولك انها عاوزه تشوف خلفك وانك عادى تتجوز تانى

خالد:وليكن من حقها تشوف حفيد ليها من ابنها الكبير

مى:بتعايرنى ياخالد دى حاجه فوق ارادتى

خالد:بصى يامى انا عمرى مااتكلمت معاكى فى الموضوع ده بس طالما انتى بتنبشى انا لسه ماقررتش اى حاجه بس اوعدك لما اوصل لقرار هاعرفك

مى:تفتكر لو انت كان فيك العيب كنت هاطلق منك عشان اتجوز واخلف

خالد:لو كان كده اه حقك تطلبى الطلاق فى الحاله دى

مى:وحقوقى عليك فين ياخالد

خالد:انتى عايشه ملكه اى حد بيحسدك

مى:ابسط حق ليا ان جوزى ينام جمبى حارمنى منه

خالد بهدوء:انا من اول يوم قلت لك مش يعرف انام جمب حد ووافقتى ماتجيش تطلبى حق اتنازلتى عنه من الاول الحياه مواقف لو كنتى اخدتى موقف كنت اكيد هلاقى حل يريحك

مى بدموع:وحقوقى التانيه اللى بشحتها منك انت عمرك ماقلتى لى بحبك

خالد:مى ياحبيبتى الحب ده وهم صدقينى مافيش حاجه اسمها حب عيشى يامى واسكتى

مى:بس…..

قاطعها خالد بصرامه:انا تعبان وعاوز انام لوسمحتى تصبحى على خير

ذهب خالد الى النوم ليس فى تفكيره سوى فرح لم يأتى له النوم من كثرة الافكار التى كانت تداهم عقله ظل يخطط ويضع خطط للانتقام منها فهل سينتصر ام لا؟

الفصل العاشر والحادي عشر

كانت ليله طويله على خالد لم يعرف النوم طريقه كلما أغمض عينيه لكى ينام كانت صورتها تتجلى امام عينه تاره يخطط لكى ينتقم منها وتاره اخرى يتذكر قصته معها ولكنه توصل فى النهايه الى حل يرضى جميع كيانه من كل شئ نوى ان يكون الوحيد المستفيد فى تلك الحكايه نعم نوى خالد ان ينتقم وان يحصل عليها فى آن واحد بل نوى ان يحصل منها على طفل وتلك كانت خطته.

مر اسبوع وتحدد يوم المقابله بالتأكيد كان محمود فقط من يجرى معها المقابله والحق يقال انه قد تفاجأ بجمال فرح بل تفاجأ انها محجبه فالصوره التى رآها لها كانت بدون حجاب كان خالد فى غرفه مجاوره يستمع للحديث الدائر بينها وبين محمود.

فى غرفة الاجتماعات

محمود:انتى ماشتغلتيش قبل كده يامدام فرح

فرح:لا يادكتور ماشتغلتش بصراحه بس انا عندى استعداد انى اعطى كل طاقتى للشغل

محمود:ممكن اعرف ليه ماشتغلتيش قبل كده

فرح:عادى انا اتجوزت وسافرت كندا ولسه راجعه

محمود:مكتوب عندى انك مطلقه هل فيه اطفال عشان انتى عارفه طبيعة شغلنا الاطفال بتعوق

فرح:لا انا ماعنديش اطفال متفرغه تمام للشغل وكمان انا معايا رخصه وعندى عربيه يعنى اعتقد ان دى ميزه فى شغل الدعايه

محمود:عظيم جدا انتى accepted يامدام فرح ان شاء الله لما نخلص مقابلات هانتصل بيكى تيجى تمضى العقد

فرحه بابتسامه:متشكره اوى يافندم

خرجت فرح مليئة بالسعاده انها قد نالت وظيفه اخيرا كان خالد بداخله شئ يريد رؤيتها ولكنه بالتأكيد لن يستطيع رؤيتها فى الوقت الحالى.

اما فريده فقد تقدمت الى المقابله ولم تقبل فهى لديها طفلان وهم يريدون موظفين متفرغون فقط للعمل.

بعد ذهاب فريده وفرح

خالد:ها عملت ايه

محمود:البت عسل ياخالد ليك حق تبقى مهووس بيها

خالد بضيق:مهووس بمين ياعم ماقلت لك عاوز أرد لها

محمود:طب عينى فى عينك كده

خالد:انجز عملت ايه

محمود:ماانت سمعت الحوار كله انت هاتمثل

خالد:كانت فرحانه بموافقتك

محمود:كانت طايره بس استنى هنا مش هيا مش محجبه امال ليه كانت لابسه حجاب

خالد باندهاش:ايه انت بتقول ايه كانت لابسه حجاب فعلا

محمود:اه لابسه لبس محترم جدا فستان جميل لونه كشمير وله حزام وكوتشى ابيض وجزمه بيضا بصراحه قمر ياخالد

لايعلم خالد لما تضايق من كلام محمود عنها بتلك الطريقه

خالد:محمود لو سمحت بطل طريقتك دى وماتتكلمش عنها كده

محمود:خلاص ياعم اهدى على اعصابك انا بنكشك

خالد:ياسيدى من الاخر انا ناوى اتجوزها

محمود:وده اسمه ايه ان شاء الله

خالد:اسمه انى لما اتجوزها النقص اللى جوايا من ناحيتها هايروح وهارد لها براحتى وهاتجيبلى طفل يحقق امنيتى

محمود بصدمه:تفتكر مى هاتوافق

خالد:ماقدمهاش اى اختيارات تانيه انا امى بالفعل بتجيبلى عرايس

محمود:بس

قاطعه خالد:مابسش يامحمود انا هاتجوزها قريب وهاتشوف

فى شقة فرح

فريده:انا زعلانه خالص كان نفسى اشتغل يافرح

فرح:ماتزعليش ياحبيبتى عارفه يافريده انا لو عندى عيله حلوه كده زى عيلتك عمرى ماهفكر اشتغل واسيبهم بس انتى عارف ظروفى

فريده:فرح انا مبسوطه عشانك اوى بس انا كنت عاوزه اثبت لمحمد جوزى انى اقدر انجح واشتغل ويبقى لى كيان

فرح:انا مش فى سباق يافريده مين يثبت لمين الحياه الزوجيه مش كده الحياه الزوجيه مشاركه انتوا الاتنين فى مركب واحد

فريده:غريبه انك انتى اللى بتقولى الكلام ده

ضحكت فرح بمراره:ماهو عشان انا اتجوزت جوازه فاشله بكل المقاييس مش عاوزاكى انتى كمان تفشلى زى جوزك كويس صدقينى وبيحبك

فريده:انتى لحد دلوقتى ماحكتيش ليا اى حاجه عن جوازتك من ايهاب وعن سبب انفصالك عن خالد

فرح:بالله عليكى يافريده مش عاوزه افتح فى القديم سيبيه مدفون كل اللى عاوزاكى تعرفيه ان جوازتى من ايهاب كانت فاشله بكل المقاييس انا مش عاوزه احكى مش عشان مش واثقه فيكى لا اطلاقا انا عاوزه انسى اللى فات نفسى انسى واعيش

فريده:حبيبتى بكره ربنا يرزقك باللى يفرحك وتتهنى صدقينى