
فتحت فرح عينيها قائلة بهدوء:
معلش سيبنى النهاردة بس هنا أرجوك، أعصابى تعبانة ماتضغطش عليا.
قومى حالا.
فرح وهي تجلس على الأريكة:
قلت لك مش عاوزه أنام جمبك، هو بالقوة؟
جذبها خالد من يدها بقوة ناحية الفراش، ولكن فرح كانت تتملص منه بقوة إلى أن استطاعت أن تنزع يدها منه، ولكنها وقعت على الأرض واصطدمت جبهتها بالطاولة الصغيرة التى تقابل الأريكة، أدى ذلك الارتطام إلى جرح عميق فى جبهتها ينزف بشدة على وجهها.
خالد وهو يتوجه إليها بلهفة حينما رأى الدماء:
فرح ايه ده؟ انتى بتنزفى!
فرح وهي تتراجع إلى الخلف بخوف من خالد:
سيبنى ماتحطش ايدك عليا، امشى وسيبنى بقى.
انتى بتنزفى يافرح، أرجوكى اهدى اهدى، نروح مستشفى الأول وهامعلك اللى انتى عاوزاه، قومى معايا.
ظلت فرح تتراجع إلى الخلف واضعة يدها على الجرح. خالد وهو يقترب منها بحب وهلع فى آن واحد:
سيبنى أشوف الجرح أرجوكى، أنا خالد يافرح عمرى مهأذيكى صدقينى.
تركته فرح يرى الجرح، لم يكن كبيراً ولكنه كان عميقاً، جذب خالد منديلاً ووضعه على الجرح:
هاجيب علبة الإسعافات هاطهره وأغطيه.
ذهب خالد إلى المرحاض وجلب علبة الإسعافات الأولية، طهر لها الجرح ووضع عليه لاصقة طبية، كانت فرح مستكينة بين يديه فقط تبكى بصمت.
قومى يالا عشان نروح المستشفى، لازم الجرح ده يتخيط غرزتين.
ما إن سمعت فرح هذا الكلام حتى قالت بخوف:
أرجوك مستشفى لأ، سيبه هايلم لوحده.
خالد بهدوء:
فرح، أنا مش عارف الحالة اللى انتى فيها دى ايه اللى وصلك ليها، بس صدقينى لازم غرزتين، مش هاتحسى بحاجة، أنا معاكى مش هاسيبك.
فرح ببكاء وهي تضع رأسها بين ركبتيها:
انت.. انت ايه ياخالد؟ انت السبب فى اللى أنا فيه، حرام عليك سيبنى بقى حرام.
خالد محاولاً تهدئة نفسه:
طيب تعالى نروح المستشفى ولما نيجى نتناقش مين السبب، قومى يالا هاساعدك تغيرى هدومك.
انصاعت فرح لأمر خالد فقد كان يتكلم وكأن صبره بدأ على النفاد. أخرج لها خالد عباءة سمراء اللون، ساعدها فى ارتدائها وارتدت فرح حجاباً وذهبوا إلى المشفى.
…………………….
فى بيت علية:
يابت ماقالش هايبات عندها ليه؟
ماأعرفش ياماما، كل اللى قاله لما يجى بكره هايفهمنى.
صوته كان عامل إزاى؟
كان مضايق.
بس اكيد هيا نكدت عليه وزمانه وراها.
مش أسلوبه على فكرة، خالد ده جدع بجد وشهم، وكمان هي لو كانت حكت كان زمانه قالى.
اه فاتتنى دى.
…………………….
فى بيت فتحى الراوى:
يعني ابنك خدها بهدومها اللى عليها؟ معقول خالد يعمل كده؟
كان مش طايق كلمة من حد وهى مش عاوزه تروح معاه، وهو مصمم ياخدها وتقريباً قالها لو مالبستيش هاخدك كده وجرها وراه ياحبيبتى وهى بتعيط.
مااتصلتيش بيا ليه؟ البلاوى دى كلها تحصل من ورايا؟
والله ياأبو فتحى كله حصل فى مسافة دقايق.
البت كانت مستورة ولا لابسة ايه؟
اه كانت لابسة بيجامة بأكمام وواسعة، وهو لبسها الطاقية بتاعتها على شعرها.
برن عليه قافل موبايله، بس لما أشوفه، من امتى واحنا بنعامل بنات الناس كده؟ مهما كان اللى عملته ماينفعش اللى عمله.
………………………..
فى المشفى كان خالد واقفاً بجوار فرح ممسكاً بيدها ليعطيها الدعم النفسى إلى أن انتهى الطبيب من خياطة الجرح. كانت فرح تشعر بمشاعر حزن طغت على جميع جوانب نفسها، رغم ما بها من جروح هو السبب فيها إلا أنها تمسكت بيده لأنها لا تجد يداً أخرى تتشبث بها، على الأقل هو ظل معها، أما غيره فكان يرسلها إلى المشفى مع الخدم ويتركها حتى تعود أيضاً مع الخدم.
الطبيب:
الجرح بسيط خالص، أنا خيطته بخيط تجميل، اسبوع وتعالوا نفك الغرز.
متشكر أوى يادكتور، فيه هنا دكتورة نسا؟ أصل المدام حامل وعاوز أطمن عليها.
اه فيه دكتورة هند موجودة فى الدور التالت.
تركهم الطبيب ورحل، تحدث خالد إلى فرح:
تعالى يافرح نروح نطمن على الجنين.
سارت معه فرح إلى طبيبة الأمراض النسائية فى صمت، هي أيضاً تريد أن تطمئن على طفلها. وبعد انتهاء الكشف:
الحمل كويس أوى، بس انتى لازم تتغذى كويس.
مش بترضى تأكل يادكتورة.
لا يامدام فرح، الطفل محتاج تغذية، انتى كده بتظلميه وبتظلمى نفسك.
تحدثت الطبيبة مع فرح وخالد وكتبت بعض الأدوية لفرح، وأخذها خالد وذهب إلى أقرب مطعم لكى تأكل، فهو يعلم أنها لم تأكل شيئاً يذكر منذ الصباح.
انت جايبنا هنا ليه؟
هانتعشى، انتى ماكلتيش حاجة النهاردة.
أرجوك روحنى، أنا تعبانة وحاسة إنى دايخة وعاوزه أنام.
انتى دايخة لأنك ماأكلتيش، فرح مش كل حاجة تعندى، وبعدين بقى معاكى!
كان خالد يتحدث بصوت عالٍ نوعاً ما، انصاعت فرح لأوامره وهبطت من السيارة معه إلى المطعم، طلب خالد لها من جميع الأصناف التى تحبها، أكلت فرح ما استطاعت أن تأكله، فهي تشعر أنها فقدت شهيتها للطعام.
ده مش أكل، كلى.
والله شبعت، ماتضغطش عليا.
تمام يالا نروح.
ذهبوا إلى بيتهم، دلفت فرح إلى الغرفة ودلف خالد وراءها:
أنا هاروح أنام فى الأوضة التانية.
فرح، أنا لسه عند كلامى اللى قلته، انتى زوجة ولازم تعرفى حقوقك وواجباتك ايه، مافيش نوم بعيد عن السرير ده، ماتقلقيش مش هاقرب ليكي لأنى أنا اللى مش عاوز أقرب.
توجهت فرح إلى المرحاض تبكى حسرة عما يحدث لها، فالمرأة يمكن أن تقول لزوجها ابتعد ولكنها لا تريد أن تسمع منه أنه هو من يريد الابتعاد. تحممت فرح وأبدلت ملابسها بمنامة قطنية صفراء اللون، فملابسها التى كانت ترتديها كان عليها دماء. خرجت فرح وجدت خالد قد رتب الغرفة ومسح آثار الدماء من الأرض وأبدل ملابسه ومستلقياً على الفراش.
خالد وهو يشير إلى الفراش:
تعالى عشان تنامى.
نظرت فرح إلى المكان الذى يشير إليه لا تعلم ماذا تفعل، لقد أهينت اليوم بالقدر الكافى منه ولا تريد القرب منه بأى شكل.
الفصل العشرون ……………………..
خالد وهو يشير إلى الفراش:
تعالى عشان تنامى.
نظرت فرح إلى المكان الذى يشير إليه لا تعلم ماذا تفعل، لقد أهينت اليوم بالقدر الكافى منه ولا تريد القرب منه بأى شكل. ظلت تردد فى أذنها كلماته القاسية القادمة من ثنايا حديثه، ظلت الكلمات تتردد فى أذنيها إلى أن وضعت يديها على أذنيها كأنها لا تريد أن تسمع أي شيء. نظر خالد إلى حالتها التى هي عليها، يراها كثيراً تنتابها حالات فزع وخوف شديد، هو يعلم أنه قسا عليها.
خالد وهو ينهض من الفراش يقترب منها ليعلم ما يحدث لها:
فرح، مالك؟
جزعت فرح من قربه وانزوت فى جانب من الغرفة قائلة:
أرجوك امشى وسيبنى، ماتضغطش عليا، انت مش كنت فى مهمة وتمت؟
مهمة ايه؟
مهمة إنك عاوز طفل وخلاص حصل، وماتقلقش أنا هاحافظ عليه لأنى أنا محتاجاه أكتر منك، وكمان أظن انت حققت انتقامك منى وحطمتنى بما فيه الكفاية. لو فاكر إنك هاتقدر تاخده منى ومراتك تربيه تبقى موهوم لأنى عمرى ماهسيبلك ابنى.
ايه الكلام اللى بتقوليه ده؟ الظاهر الوقعة أثرت عليكى.
أنا مابقولش أي كلام، انت عارف إن دي الحقيقة، بطل كدب بقى.
خالد وهو يحاول أن يتمالك نفسه من الغضب:
أنا مش بكدب، وأظن إنى قلت لك إنى عمرى ماهطلقك عشان ابننا يتربى بينا، كل اللى أنا قلته إنك تسمحى لمى تشاركك فى تربيته، إنما هو ابنك وهايفضل معاكى.
فرح ببكاء:
انت كداب ياخالد وهاتاخده منى! حماتك قالتلى إنكوا اتفقتوا على كده، قالت إنكوا هاتاخدوه منى وبنتها هاتربيه.
جثت فرح على ركبتيها أمامه وقالت بتوسل وانهيار:
أرجوك ماتاخدوش منى، ده الأمل اللى مخلينى مكملة، عاوزه أحس إن فيه حد أكون أنا كل دنيته، على فكرة أنا هاحبه أوى وهو كمان هايحبنى، أرجوك سيبلى آخر أمل ليا.
