قصص وروايات

خالد 3الاخير

أدمعت أعين خالد من كلماتها، جثا بجوارها على الأرض ولم يدرِ سوى وهو يجذبها فى أحضانه:

والله ماهاخده منك، انتى عارفانى أنا مش كده، ماعرفش ايه اللى خلى خالتى تقولك الكلام ده. أنا ماقدرش أبعد طفل عن أمه، ولو مش عاوزه مى تشارك فى تربيته انتى حرة، هو ابنك وانتى حرة فيه طبعا.
ابتعدت فرح عنه وهي مازالت على حالتها الباكية:

بجد؟ بجد ياخالد هاتسيبه ليا؟ أوعدنى!
خالد بغصة فى قلبه فهي لم تعد تصدقه:

أقسم بالله ده اللى هايحصل، مافيش أحسن من ربنا أحلف بيه، ووعد يافرح إنى عمرى ماهفرق بينك وبين ابنك. أنا هاروح أنام فى الأوضة التانية عشان تاخدى راحتك، لأنى عارف إن وجودى مضايقك.
تركها خالد وذهب إلى غرفة أخرى، أما فرح فنهضت وهي تضع يدها على بطنها كأنها تطمئن طفلها وتقول له نحن معاً.

…………………………….

فى اليوم التالى استيقظ خالد مبكراً وطلب من محمود أن يوفر له طقم حراسة ليقوم بحراسة الفيلا فهو يخشى أن تهرب فرح. استيقظت فرح من النوم وسمعت أصواتاً تأتى من الخارج، فتحت باب الشرفة ورأت أفراد حراسة وخالد يتكلم معهم، انتظرت حتى دلف إلى المنزل وهبطت له قائلة بغضب:

مين دول؟ انت جايبهم ليه؟
دى حراسة، عادى يعني.
انت جايب لمراتك التانية حراسة ولا ليا أنا بس؟
انتى عوزه ايه دلوقتي؟
أنا مش فى سجن، أنا مش هاعيش تانى فى سجن، شيل الناس دى، تمام؟ أنا هاكنس وأمسح وأطبخ بس شيل الناس دى من هنا.
فرح، ماحدش هايمشى والحراسة هاتفضل هنا، وبعدين ايه اللى تاعبك؟ انتى كنتى ناويه تهربى ولا ايه؟ وعلى فكرة مش هاتتحركى فى أي مكان إلا بيهم.
ظلت فرح تتذكر ذكرياتها المؤلمة، وكان التاريخ يعيد نفسه من جديد، لا يتركها أحد بدون حراسة بجانب البيت.

فرح:

لا لا، انت أكيد بتهزر صح؟ أنا مش فى سجن.
لو انتى شايفه إنى لما اجيب طقم حراسة للبيت يبقى سجن خلاص تمام، اعتبرى نفسك فى سجن.
أنا بكرهك.
شعور متبادل، أنا نازل رايح شغلى، اعملى حسابك إنى هابات هنا تلت أيام وعند مى تلت أيام، يعني التلت أيام الجايين عندك، أجي ألاقى الغدا جاهز يامدام. اكتبى طلباتك اللى محتاجاها فى ورقة وأنا نازل هاخدها، هابعت لك الحاجة مع حد من اللى بره.
صعد خالد إلى الأعلى، كلما أراد أن يأخذ هدنة معها تأتى الرياح بما لا تشتهي السفن ويتشاجرون من جديد.

……………………….

فى بيت فتحى الراوى: دلف خالد إلى منزل والده ووجدهم فى غرفة الاستقبال يتناولون وجبة الأفطار.

كويس إنك جيت يابيه، ايه اللى انت عملته امبارح ده؟
واحد أخد مراته، ايه المشكلة فى كده؟
واخدها بالبيجامة اللى عليها؟ أنا ربيتك على كده ياخالد؟
أنا أسف يابابا بس هي إنسانة مستفزة، بدل ماتحاول تكسبنى لا دى بتستفزنى وبتعاند قصادى.
يابنى انسى اللى حصل، هو سهل عليها إنها تتفاجأ إنك متجوز ومخبى عليها؟
عارف ياحاج لو الناس كلها زيك انت وماما كانت الدنيا عمرت.
فرح عاملة ايه ياخالد؟ اتراضيتوا؟
اه ياماما كله تمام، سيبونا نحل مشاكلنا بنفسنا وأنا أسف على اللى حصل امبارح يابابا.
خلاص يابنى اقعد افطر.
أنا هاقوم أصب لكوا الشاى على ماتفطر ياخالد.
جلس خالد مع والده يتناولون الطعام سوياً ويتسامرون، ودلفت عزة إلى المطبخ ودلف إليها خالد:

ماما، انتى سيبتى فرح امبارح مع خالتى لوحدهم؟
فيه حاجة ولا ايه يابنى؟
افتكرى بس وأنا هاحكى ليكي كل حاجة.
اه خالتك أول لما جت قالتلى اعملى شاى، دخلت عملته وهي فضلت مع فرح، فيه حاجة ولا ايه؟
كملى، وايه اللى حصل؟
ماحصلش حاجة، فرح دخلت أوضتها وقالت إنها تعبانة وعاوزه تنام.
شكلها كان عادى يعني؟
ماتفهمنى ايه اللى حصل؟
قص خالد لوالدته ما قالته فرح، صمتت عزة لوهلة قائلة:

أكيد فرح مش هاتكدب يابنى.
يعني انتى تصدقى إن خالتى تعمل كده؟
أنا مش عاوزه أظلم اختى بس فرح كان باين عليها إنها مضايقة أوى، أنا قلت إنها تعبانة، حتى فى وسط الكلام سألت خالتك اتكلمتوا فى ايه وماقالتش، قالت قلت لها تاخد بالها من نفسها. عارف؟ أنا أصدق إن خالتك قالت كده لأنها بتحب مى أوى، ممكن تكون عاوزه تطفش فرح، وبعدين خالتك مش سهلة، دي مكارة بس اعمل ايه اختى وبحبها وماليش غيرها.
أنا هاروح لخالتى دلوقتي.
لا ماتروحش، اردم على الكلام عشان المواضيع ماتكبرش.
طيب أنا هاروح شغلى، عاوزه حاجة؟
ابقى هاتلى فرح، وحشتنى أوى.
انتى بتحبيها ليه؟
بحبها من غير سبب، بحبها عشان بحبها وبحس إنها بنتى، على فكرة البت دى غلبانة أوى.
والله ياأم خالد انتى اللى غلبانة.
على فكرة هي قالتلى إن أبوها غصبها على الجواز.
وأبوها اللى غصبها تقعد مع جوزها ست سنين؟
ماهى خلاص كانت اتجوزت، هاتعمل ايه یعنی؟
ماما، فرح كانت بنت لما اتجوزتها، جوزها كان عاجز يعني.
يانادمتى! دا حكاية ولا فى الأحلام ياولاد! ياحبيبتى يابنتى.
انتى هاتشيلينى أقسم بالله! افهمى ياماما، قعدت ست سنين ليه لما هو كده؟ كانت لو مغصوبة فعلاً اتطلقت وكان ليها أسبابها.
الله أعلم يابنى باللى حصل ايه.
ياماما اقتنعى بقى، هي منين ماتلاقى أمور بتتسلك ماهى وافقت بيا دلوقتي، اعقليها.
بص أنا بحبها من غير سبب وأظن إنك كمان بتحبها.
أنا رايح شغلى، انتى رايقة.
………………………

ذهب خالد إلى عمله وجد محمود بانتظاره:

ايه يابنى، احنا هانشحتك ولا ايه؟
يابنى ارحمنى.
صحيح، جوز الاتنين هتلاحق على ايه ولا ايه؟
انت بتقول فيها! يالا نشوف شغلنا انجز.
قاطع حديثهم صوت رنين هاتف خالد:

ألو، إزيك يامى؟
أنا هاخرج كمل كلامك.
أومأ له خالد برأسه:

انت فين ماجتش ليه؟
أنا كنت هاعدى عليكى الصبح بس رحت لماما ورحت الشغل.
هاتعدى عليا بعد الشغل؟
مى، أنا هافضل التلت أيام دول مع فرح.
ليه إن شاء الله؟
وطى صوتك وسيبنى أكمل كلامى، انتى عارفة إنها حاولت تبتعد عنى امبارح وأنا جبت حراسة للبيت وكمان أنا قسمت الأيام مابينكوا، تلاتة هنا وتلاتة هنا.
ياشيخ بقى! بساوينى بيها ياخالد؟
انتى مراتى وهيا مراتى يامى.
اعمل اللى انت عاوز تعمله.
يامى افهمى، ماتزوديش همى أرجوكى.
مع السلامة ياخالد.
أغلقت مي الهاتف معه وتوجهت إلى والدتها الجالسة بجوارها تستمع إلى حديثهم بغضب:

سمعتى؟
أنا قلت لك البت دى مش سهلة ماصدقتيش.
البيه بيقولى تلات أيام ليا وتلاته ليها!
هتلاقيها قالت له اعدل وانتى عارفاه مابيحبش الظلم.
أنا خايفة تاخده ليها وهى اللى هاتخلف.
ماتخافيش، سيبنى أفكر لها فى تصرف وناخد منها العيل، بس أنا عارفاكى تهدى كده وماتعمليش مشاكل معاه.
……………………….

أنهى خالد يوم عمل شاق وذهب إلى منزله مع فرح، وجد البيت مرتباً ترتيباً أنيقاً ورائحته جميلة، ابتسم خالد رغماً عنه، لم يكن يتوقع منها ذلك إطلاقاً. هو يعلم أنها مدللة ولكن ما لا يعلمه أن فرح تعلمت إتقان الطبخ فى خلال الست سنوات الماضية وكانت تقف فى المطبخ بالساعات لتتعلم فهي اتخذت الطبخ هواية. اشتم خالد رائحة طعام شهية آتية من المطبخ، دلف وجد فرح ترتدى ملابس المطبخ وواقفة تعد الطعام:

السلام عليكم.
وعليكم السلام ورحمة الله وبركاته، أجهز السفره؟
فاجأتينى بصراحة بيكى.
مش فاهمة.
يعني البيت عشرة على عشرة، ريحة الأكل واضح إنه حلو زيك زي أي ست.
نظرت له فرح بغضب:

وليه أنا مش ست ولا ايه؟
ست وست أوى كمان.
اضطربت فرح من نظراته:

أجهز الأكل ولا مش جعان؟
علم خالد أنها تغير مجرى الحديث:

لا دا أنا واقع من الجوع، هاطلع أغير هدومى وأنزل.
أبدل خالد ملابسه بملابس بيتية مريحة وهبط إلى الأسفل وجد السفرة جاهزة، جلس على السفرة ناظراً إلى الطعام بإعجاب:

الله! ايه الجمال ده؟ محشى ورق عنب ولحمة وجلاش!
دوق الأول ماجايز وحش ومايعجبكش.
ذاق خالد الطعام وراق له كثيراً:

انتى اتعلمتى الطبخ فين وامتى؟
عادى یعنی، اتعلمت وخلاص.
انتهوا من وجبة الغداء ولملمت فرح مكان طعامهم ودلفت إلى المطبخ لتجلى أوانى الطعام، دلف خالد وراءها:

عاوزه حاجة؟
بتعملى ايه؟
زي ماانت شايف، بغسل الأطباق.
طيب سيبهم وتعالى أنا عاوزك.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى