قصص وروايات

خالد 3الاخير

هاتف خالد محمود وطلب منه أن يأتيه بشخص يجيد تركيب الكاميرات ويجلبه له على الفيلا التى يقطن بها مع مي، وبالفعل تم تركيب كاميرات فى جميع الغرف بمنزل خالد ومي. كان خالد يريد أن يعرف الحقيقة ويعرف إن كانت مي متورطة مع والدتها فى الكذب والتضليل أم لا.

هاتف خالد مي:

إيوة يامى، عاملة ايه؟
كويسة، انت مشيت ليه؟ خرجت لقيتك مشيت.
تعالى بس وأنا هاحكى ليكي على كل حاجة، وهاتى خالتى معاكى.
فيه حاجة ولا ايه؟ قلقتنى.
تعالى انتى وخالتى، عاوزكم فى موضوع مهم.
مسافة السكة وهانيجى.
أخبرت مي علية أن خالد يريدهما فى منزل مي وخالد، وبالفعل ذهبتا إليه. فى منزل مي وخالد:

فيه ايه يابنى جايبنا على ملا وشنا ليه؟
خالتى، ايه اللى حصل بالظبط مع فرح؟
اللى حصل اللى حكيته يابنى، هي البت دى قالت لك ايه؟
قالت اللى قالته وأنا مصدقها.
اللى حصل هو اللى قلت لك عليه، وانت حر تصدق ماتصدقش.
أنا ماشى ياخالتى وهاجى بكره تكونى راجعتى نفسك وتحكى لى اللى حصل بصدق، وياريت يامى ماتكونيش عارفة أي حاجة عن اللى حصل.
تركهم خالد وذهب إلى سيارته وفتح الهاتف على برنامج الكاميرا الخاصة بغرفة الاستقبال التى تركهم للتو فيها ليرى ماذا سيقولون.

عن مي وعلية:

شفتى محموق عشان الهانم إزاى؟
قلت لك البت دى مش سهلة، قلتى دى ضعيفة وغلبانة، هتلاقيها دمعت دمعتين وصدقها.
اه ضعيفة، عارفة ليه؟ لأنها نفذت الخطة اللى رسمتها مع أبوها عشان تسيبه.
يعني كنتى عوزاها تعمل ايه قدام جبروت أبوها؟
شفتى هايموت عليها إزاى؟ دا حتى مابصش فى وشى! اعمل ايه أكتر من اللى عملته زمان وفرقت بينهم؟
دا لو عرف إنك اللى رحتى لأبوها زمان وعرفتيه علاقتهم وإنك السبب فى فراقهم ممكن يطلقك!
اللى كان يعرف مات واندمس، وزي ماخططت زمان وأقنعت أبوها إنه أنا وهو على علاقة ببعض وهو طمع فى فلوس بنته، دلوقتي برضه هاعرف إزاى أمحى فرح دى من على وش الدنيا!
كان خالد فى الخارج يشاهد مايحدث ولا يصدق ماسمعه للتو، هل مي هي التى فرقت بينهما وهى من ذهبت إلى والد فرح؟ هل هي وراء عذابه وعذاب فرح طوال السنوات الماضية؟

دلف خالد إلى المنزل مرة أخرى وجدهم مازالوا فى صالة الاستقبال يتحدثون:

رجعت بسرعة كده ليه؟ نسيت حاجة؟
بهدوء ياخالتى، امشى من بيتى.
بتقول ايه ياخالد؟
بقولك بره بيتى، أنا لسه عامل حساب صلة الرحم.
قومى يابت يامى، الظاهر خرف!
سيبى بنتك عاوزها، ليا حساب معاها.
الظاهر إن الهانم قلبتك على أهلك.
ماتجبيش سيرتها، وبره بقى مش عاوز أشوفك!
ذهبت علية مسرعة من أمامه فوجهه لا يبشر بالخير إطلاقاً.

انت إزاى تطرد ماما؟ انت اتجننت؟
صفعها خالد صفعة أوقعتها على الأرض:

بسببة انتى وأمك ضربت أعز إنسانة ليا وفى المستشفى دلوقتي بسبب عمايلكوا! انتوا ايه، مخلوقين من نار؟
انت بتهلوس؟ بتقول ايه؟
فتح خالد الهاتف على برنامج الكاميرا لتشاهد ما قالوه منذ قليل، كانت مي تشاهد فى بكاء وحسرة، لقد حدث ما لم تتوقعه.

خالد وهو يشير إلى الكاميرا:

شايفه الكاميرا دى؟ كانت بتسجل كلامكم! ماأعرفش إنى كنت متجوز شيطان! أنا كنت عاوز أعرف حقيقة اللى أمك قالته، ماأعرفش إنى هاكتشف بلاوى وأعرف إنك السبب فى اللى حصل وإنك اللى فرقتى بينى وبين فرح!
أنا عملت كده لأنى حبيتك بجنون!
حب ايه اللى بتتكلمى عنه؟ اللى بيحب بيضحى، فرح هي اللى حبتنى، فرح هي اللى ضحت علشانى!
أنا حبيتك أكتر من أي حد فى الدنيا ياخالد صدقنى.
وأنا ماحبيتش ولا هاحب غيرها! سبحان الله ياشيخة، حاولت أحبك ماقدرتش! عارفة؟ أنا من أول يوم اتجوزت فيه فرح بنام جمبها ماكنتش بنام إلا وهي فى أحضانى لحد مارحتى انتى عشان تقهريها وتعرفيها إنى متجوز!
بكت مي بمرارة، فأكمل خالد بجمود:

لعلمك، حتى وأنا بقسى عليها كنت بحبها! انتى ولا حاجة بالنسبة لى دلوقتي. تحكى لى كل اللى حصل زمان مع أبوها!
حرام عليك اللى بتعمله فيا ده!
جذبها خالد بقوة قائلاً بصراخ:

احكى انجزى!
شفتها معاك آخر يوم امتحاناتك وانتوا ماسكين ايدين بعض، صورتكوا ورحت عند خالتى وعرفت منها إنها جت بيتكوا وأتاكدت إنكوا بتحبوا بعض. رحت لأبوها مكتبه ووريته الصور وقلت له إننا كنا بنحب بعض وأنك…
طمعت فى بنته عشان الفلوس، صح؟
ورسمنا خطة الخطوبة واللى هايحصل فيها وهي نفذت اللى اتطلب منها.
نفذت عشان كانت خايفة عليا!
أنا حبيتك ودافعت عن حبى ليك، هي اتنازلت عنك بسهولة واتجوزت.
ده مبدأ القوى ياكل الضعيف، انتى عرفتى توصلى لى وتتجوزينى بس سبحان الله عمرى ماحبيتك، إنما هي رغم ضعفها إلا إنى عمرى مانسيتها. أنا كنت معاها حاسس بمعنى السعادة، إنما معاكى كنت بحس إنى بؤدى واجب، وواجب تقيل أوى كمان.
صمت خالد لبرهة ثم أكمل:

مى، انتى طالق، طالق، طالق بالتلاتة.
انت بتقول ايه؟!
بقولك انتى طالق، أقول تانى طالق، أقول تالت طالق! بره بيتى ومن غير ماتاخدى حاجة، زي ماخدتك باللى عليكى هاتمشى باللى عليكى.
نهضت مي من الأرض قائلة ببكاء هستيري:

خالد، أنا بحبك صدقنى، ماتطلقنيش ياخالد!
بره بيتى! اخرجى من حياتنا بقى، بره بره!
خرجت مي فى ذل وانكسار تبكى بحسرة على ما جنته يداها، نعم تزوجته بالحيلة ولكنه لم يحبها، نعم فعلت الأفاعيل لكى تفرق بينه وبين فرح ولكنه ظل يحبها ويقدس ذلك الحب.

………………………….

ذهب خالد إلى المشفى وجد فرح مازالت نائمة، قبلها من يديها وجبينها وخرج إلى والديه.

انت رحت فين يابنى؟
اتفرجوا على الفيديو ده بس.
شاهد كل من فتحى وعزة الفيديو الذى سجلته الكاميرا.

لا حول ولا قوة إلا بالله! شفتى ياعزة بنفسك اختك وهي بتخطط لابنك؟
البت اللى جوه دى شافت ظلم.. آه ياوجع قلبى عليكى يابنتى!
أدمعت أعين خالد وقال بمرارة:

ماشافتش فرح فى حياتها، ماكنش ليها من اسمها نصيب!
مى وعلية يعملوا كده؟ كانت مى بتيجى تعرف أخباركم منى وأنا زي الهبلة كنت بحكى!
شافت فرح وهي جاية لى الكلية وصورتنا وجات لك وعرفت منك إنها جات بيتنا وراحت لأبوها مكتبه والباقى انتوا عارفينه.
يااه يافرح يااه!
على فكرة أنا طلقت مى وطردتها من البيت.
أقل واجب يتعمل معاها، حسبي الله ونعم الوكيل. حاول يابنى تخلى فرح تسامحك بأي طريقة وماتملش من محاولاتك لأنها أكيد مجروحة منك أوى.
تقوم بالسلامة وأنا هاعوضها عن كل اللى شافته، أيامها كلها هاتكون سعادة، على فكرة هي بتحبكوا أوى.
أنا بحبها زي ولادى، كان نفسى طول عمرى فى بنت.

9 من 9التالي
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى